BAWACHA : YASEMA HAWATOACHA KUIKOSOA KATIBA PENDEKEZWA...

BARAZA la Wanawake CHADEMA, (BAWACHA), limesema kuwa halitaacha kuwaeleza wananchi mapungufu yaliyopo kwenye Katiba Pendekezwa kwani Rais Jakaya

Kikwete ndiye aliyeanza kampeni kabla ya wakati ya kuhamasisha wananchi kuipigia kura ya ndiyo.

Aidha, limesema likimaliza ziara hiyo ya kanda ya Ziwa Magharibi, watarudi bungeni kuihoji serikali sh bilioni 2.5 zinazotarajiwa kutumiwa na Ikulu kwenye vyombo vya habari kushawishi kura ya ndiyo zinatoka kwenye fungu gani na zilipitishwa na bunge lipi.

Hayo yalisemwa juzi na Mbunge wa Viti Maalum, Suzani Lyimo, wakati akiwahutubia wananchi wa Tarime kwenye uwanja wa Serengeti akiwa ameambatana na Makamu wa BAWACHA Taifa, Hawa Mwaifunga, Katibu Grace Tendega, Naibu Katibu Kunti Yusuph, wabunge wa viti maalum Ester Matiko, Grace Kiwelu na Chiku Abwao.

Alisema kuwa, Rais Kikwete ndiye alikuwa mtu wa kwanza kuanza kampeni ya kuipigia chapuo katiba pendekezwa, kwani hata wakati akipokea mwenge wa Uhuru aliwasisitiza wananchi kuipigia kura ya ndiyo kwa madai kuwa ni nzuri.

“Labda wachukue sindano na uzi watushone midomo yetu vinginevyo tutaendelea kuwaeleza wananchi ubovu wa Katiba pendekezwa…Rais Kikwete akipokea Mwenge wa Uhuru tulimsikia akifanya kampeni waziwazi, akiwaambia wananchi kuwa katiba pendekezwa ni nzuri na ikifika wakati wa kuipigia kura wasiache kuipa kura zote za ndiyo,” alisema Lyimo.

Alisema kuwa, inashangaza kuona wakati Rais akidai kuwa muda wa kampeni kwa ajili ya katiba bado, lakini viongozi wa Umoja wa Katiba ya Wananchi (UKAWA), wameweka hadharani nyaraka zikionyesha kuwa Ikulu wanatenga sh bilioni 2.5 kwa ajili ya kuendesha kampeni ya kura za ndiyo kupitia vyombo vya habari.

“Tukirudi bungeni tutaenda kuhoji hizi sh bilioni 2.5 zinatoka kwenye fungu gani na zinatolewa kwa utaratibu upi, wakati kwenye bajeti tuliyopitisha ya mwaka 2014/2015 wa fedha suala hili halikuwepo,” alisema Lyimo huku akishangiliwa na wananchi.

Tendega aendelea kulia michango ya maabara

Katibu wa BAWACHA, Grace Tendega, alisema kuwa wataendelea kupinga wafanyakazi wa umma kukatwa mishahara yao bila kuridhia kwa ajili ya kuchangia ujenzi wa maabara mpaka serikali itakapofuata sheria.

Alisema kuwa, hawapingani na ujenzi wa maabara lakini wanachokataa ni utaratibu unaotumika kukusanya fedha za ujenzi huo ambao umegeuka kero kwa watumishi wa umma na wananchi maskini wa vijijini, ambao wengine huwalazimu kukimbia makazi yao kujificha kutokana na hali ngumu ya uchumi inayowakabili.

“Narudia tena kusema kama kweli Rais Kikwete ana nia ya dhati na mpango huu wa ujenzi wa maabara kwenye shule za kata, basi apunguze bajeti yake ya sh bilioni 50 aliyotengewa kwa safari za nje ya nchi, aipeleke ikatekeleze ujenzi huo,” alisema Tendega.

Kunti ataka Polisi wanaoua wananchi Tarime wachukuliwe hatua

Naibu Katibu wa BAWACHA Taifa, Kunti, alisema kuwa inasikitisha kusikia kuna wananchi wanaouawa na polisi huko Nyamongo maeneo ya kuzunguka mgodi wa dhahabu wa North Mara, lakini hakuna hatua zozote za kisheria zinazochukuliwa dhidi yao.

Alisema kuwa kazi ya polisi ni kulinda usalama wa raia na mali zao, hivyo inapotokea polisi wanaua raia ni lazima wachukuliwe hatua za kisheria, kwani hakuna chombo chochote chenye mamlaka ya kutoa uhai wa Mtanzania na kikanyamaziwa, kwani nchi inaendeshwa kwa utawala wa sheria.

“Tunataka wale wanaoua vijana wetu kule Nyamongo, wachukuliwe hatua za sheria wafikishwe mahakamani kwa makosa ya mauaji, hatukubaliani na mauaji ya aina hii kwenye Taifa huru na tunawaahidi wana Tarime tuko tayari kuungana na nyie kuandamana mpaka mgodini kupinga mauaji haya wakati wowote mkituhitaji,” alisema Kunti.

CHADEMA wampiga marufuku Makonda kukanyaga Mara

Katibu wa CHADEMA mkoani Mara, Chacha Heche, amemtaka Kiongozi wa Chipukizi wa UVCCM, Paul Makonda, kuwaomba radhi Watanzania kwa vitendo vya utovu wa nidhamu alivyomfanyia Waziri Mkuu Mstaafu, Jaji Joseph Warioba, vinginevyo asikanyage mkoa huo.

Alisema kuwa haiwezekani vijana wa Tanzania kunyamazia vurugu alizofanyiwa kiongozi huyo Mstaafu aliyelitumikia Taifa kwa uadilifu kutokana na misimamo yake ya kutetea maslahi ya umma kwenye rasimu ya katiba, hivyo akasisitiza kuwa kama Makonda hataomba msamaha basi aishie eneo la Rubana mpakani mwa mikoa ya Mwanza na Mara.

Matiko ahoji uprofesa wa JK aliopewa China

Mwenyekiti wa BAWACHA mkoani Mara, Ester Matiko, alisema kuwa uprofesa aliopewa Rais Kikwete nchini China, unaibua maswali mengi hasa ukizingatia tuhuma nzito zilizoibuliwa hivi karibuni na vyombo vya habari vya kimataifa vya BBC kuwa msafara wa rais wa China, Xi Jinping uliokuja nchini mwaka jana uliondoka na pembe za ndovu.

Matiko ambaye pia ni mbunge wa viti maalum, alisema kuwa utata wa uprofesa huo unazidi kuibua maswali hasa ikizingatiwa kuwa wakati Rais huyo wa China alipofika hapa nchini alisaini mikataba 28 ya gesi na mafuta ambayo mpaka sasa ni siri, hata wao kama wawakilishi wa wananchi hawaijui.

Ziara ya BAWACHA kanda ya Ziwa Magharibi mpaka sasa imetumia siku 21, ambako wamefanya mikutano kwenye mikoa ya Mwanza, Geita, Kagera, Simiyu na Mara.

POSTED BY MARAYETU...